Plommeterte

Eg er så heldig å ha plommetre
i hagen min. Plommer er nydelege
i seg sjølv, men også herlege
som syltetøy og i kaker og dessertar.
Har du ikkje plommer kan du gå på
slang, eller kjøpa dei i butikken.
Her kjem ei oppskrift på ei deilig
plommeterte som er enkel å laga:

Mjukt smør til pensling
Brunt sukker
10-12 plommer, avhengig
av kor stor form du bruker
100 g smelta smør
2 1/2 dl sukker
2 1/2 dl mjøl
1 ts bakepulver
1/2 ts salt
1 egg

Skyll og del plommene i to, og fjern steinen.
Du treng nok halve plommer til å
fylla botnen i ei eldfast form.
Pensla den eldfaste forma med mjukt smør,

og dryss eit lag med brunt sukker i botnen.
Legg dei halve plommene ned i forma
slik at dei dekker botnen.





Bland dei tørre ingrediensane
i det smelta smøret. Rør saman egget
og ha det i røra. Smør/trykk røra over
plommene, slik at dei er nokolunde
dekte av røra.



Steik terta i 40 minutt
på 170 grader. Server gjerne med
fløyte eller vaniljesaus! Nam.

Helgebakst: Grytebrød og sitronkake

Av og til får eg bakeånda over meg, og
laurdag prøvde eg meg på noko nytt.
Eg fekk ei keramisk gryte til jul, og ville derfor
prøva eltefritt grytebrød. Det er superenkelt!
Eg rørte ingrediensane samen klokka ti fredag
kveld, og laurdag rundt klokka tolv steikte eg
brødet. Eg burde kanskje latt det heva enda meir,
det blei litt kompakt, men nysteikt brød er jo digg
uansett, og har du tid er det ingenting som er enklare :)
Eg følgde denne oppskrifta.

Etterpå bakte eg sitronkake. Den er ganske
enkel å laga, er saftig på grunn av "glazen",
og har skikkeleg god sitronsmak!
Eg brukte oppskrifta til Ida Gran-Jensen bak
bloggen "Cake please".

 

Anbefaler denne altså! :)
Ha ein fin søndag <3

Kalorifattig helgekos: Fantastisk sjokoladefudge

I prosessen eg har hatt med vektnedgang (no har eg gått ned 10 kilo) har eg vore på leit etter kalorifattige alternativ til kosemat. I førre innlegg nemnte eg at Bakekona har fantastiske oppskrifter, men i januar/februar-utgåva av Det Nye fann eg også nokre fantastiske oppskrifter på heimelaga sjokoladesnop. Denne sjokoladefudgen er noko av det BESTE eg har smakt, og kvar rute/stykke har berre 142 kaloriar!! Du berre MÅ prøva den! :D
Nokre av ingrediensane verkar kanskje litt rare, men eg lovar deg at det er verdt det å prøva å få tak i dei! Oppskrift på mandelsmør finn du her, kjempeenkelt å laga!

Her er oppskrifta på glutenfri, laktosefri, vegan, raw food sjokoladefudge:
(ca 16 bitar)

2 1/2 dl dadlar, utan steinar

1 1/4 dl mandlar

3/4 valnøtter

3/4 dl mørkt kakaopulver
2 modne bananer

4 ss mandelsmør

3/4 dl mørkt kakaopulver

4 ss agavesirup (eller flytande honning)

1. La dadlane mjukna i ei skål med varmt vatn i ein halvtime, hell så av vatnet
og hakk dei i små bitar. Ha dadlar, mandlar, valnøtter og 3/4 dl kakaopulver
i ein food prosessor og køyr til det er godt blanda og blir ein slags "mase".

2. Ha aluminiumsfolie i ei 20 x 20 cm form, gjerne litt oppover kantane.
Press blandinga godt ned i forma med ei skei og dekk botnen.
3. Ha bananer, mandelsmør, den siste delen av kakaopulveret og agavesirupen i food prosessoren
og køyr til det er godt blanda og jamt. Fordel blandinga over botnlaget i forma og jamn det til.

4. Sett det heile i frysaren i 30 minutt før du løftar heile blandinga ut av forma og deler det i 16 bitar
med ein skarp kniv. Oppbevar bitane i frysaren.

(For english recipe, contact me :)

Pavlova til kvelds?

Pisk Oh yes! I alle fall når dei kjem i mini-format og er sukkerfrie! EG har nettopp oppdaga bloggen til Bakekona og alle dei fantastiske lavkalori/sukkerfrie oppskriftene hennar, så i kveld måtte eg prøva mini-pavlovaen. Den er veldig god til å vera "sunn". Vil du prøva? Her er oppskrifta på fire stk:

2 eggekviter

50 g sukrinmelis

1/2 ts Maizenna

1 ts kvitvinseddik

Pisk eggekvitene stive saman med eddik og Maizenna, og pisk så inn melis. Marengs"kremen" skal vera glatt og tjukk, ikkje rennande. Ha den over i ein sprøytepose eller brødpose og sprøyt ut fire plettar på eit bakepapirkledd steikebrett. Steik på 120 grader i 40-50 minutt til dei er gylne i kantane, stive utanpå og litt seige inni. Desse er berre 9 kcal per stk!

Oppå hadde eg mager vaniljekesam og frukt og bær, du kan og bruka vaniljeyoghurt eller piska krem. Yum! :D

Mini-hus

Er ikkje desse berre skikkeleg søte?
Eg laga ein heilt enkel mal i papp, og skar ut delene til desse mini-peperkakehusa
av tynn deig med ein skarp kniv. Det beste er å bruka melis til å lima dei med,
knekk synest så godt på så små hus.
Perfekte til kaffien eller kakaoen.

Knask til kaffien: Biscotti

Biscotti er tørre italienske kjeks som passar ypparleg til å dyppa i kaffien.
Eg har funne ei veldig enkel oppskrift, og då går det kjapt å laga dei.
Desse er fine å gi vekk i gåve også!

Du treng:

200 g mandlar, snitta eller grovt hakka

3 eggeplommer

250 g sukker

3 ss vaniljesukker

3 eggekviter

1 klype salt

finrive skal av 1- 1 1/2 sitron

400 g kveitemjøl

1 1/2 ts bakepulver

Rist mandlar forsiktig i ei steikepanne. Finn fram ein vid bolle og rør saman eggeplommer, sukker og vaniljesukker med ein handmiksar til den blir krema. Visp eggekvitene stive med ei klype salt. Vend forsiktig eggekvitene inn i eggekremen, litt og litt om gongen. Tilsett mandlar og rive sitronskal, og rør så forsiktig inn sikta kveitemjøl og bakepulver. Du skal no ha ein ganske fast deig.

Del deigen i tre emne som du ruller til tjukke pølser som nesten er like lang som steikebrettet ditt er breitt. Legg pølsene på eit bakepapirkledd steikebrett. Form emna slik at dei blir ca 2 cm høge og 6 cm breie.  Steik biscottipølsene ved ca 175 grader i ca 30-35 minutt, eller til dei er passe steikt. Ta dei umiddelbart på eit skjerebrett og skjer ca 1 1/2-2 cm breie skiver, på skrå.
La biscottiane avkjølast på ei rist.

Vel bekomme!

Heimelaga peparkakehus

For første gong har eg laga eit peparkakehus frå "botnen"!
Eller, det vil seia, deigen var kjøpedeig frå Rimi, og ikkje var den særleg god heller :p Den blåste seg veldig opp i omnen, og derfor blei husdelane skeive. MEN eg har i alle fall laga veggjer og tak til huset sjølv, montert dei (med hjelp av mannen) med smelta sukker og dekorert dei.
Sjølve dekoren er inspirert av Den gode feen, ho lagar heilt nydelege peparkakehus!
Ho har også skrive innlegg om korleis du kan laga mal til eige hus.

Eg pynta husdelene og lét dei tørka før eg monterte huset.
Noko eg gløymte: Vindauge. Pytt sann. Eg laga dei av melisglasur i staden ;)

Noko skakt, og glasuren blei etter ei stund litt misfarga av knekken som held huset saman, men alt i alt er eg veldig nøgd. Neste prosjekt er å laga hus i mindre skala.

Kva synest du om huset mitt?

 

For the first time I made a gingerbread house from scratch (except the dough was store bought)!
Love this way of decorating it, inspired by this blog. What do you think?

Helgefrukost: Grove og sunne pannekaker

Stikk innom for å dela ei oppskrift med dykk! Desse pannekakene er veldig gode og mettande, og så er det berre 312 kaloriar per porsjon (ca tre pannekaker) utan tilbehør. Eg plar å ha litt syltetøy og vaniljekesam til :) Dei fungerer sjølvsagt like godt til alle måltid, ikkje berre som frukost.
Her er oppskrifta:

1,5 dl kveitemjøl

1,5 dl sammalt kveite

3 egg

5 dl ekstra lett mjølk

1 ts salt

1 ss matolje i røra

1 ss matolje til steiking

La røra svelle i ca. 30 min før du steiker pannekakene gylne.
Vel bekomme!

Graskarkake og rista graskarfrø

Som eg skreiv i eit tidlegare innlegg har eg i år gjort nytte av innmaten i graskaret
etter at eg laga graskar-lykt. 

Etter å ha skrapa ut så mykje som mogleg av graskaret separerte eg frøa for seg.

Kjøt og "trådar" kokte eg møre i nokre minuttar,
før eg laga det om til graskarpuré ved å mosa det i foodprocessoren.

Eg fann ei engelsk oppskrift på "Honey Pumpkin Cake", og omsette den omtrentleg til norsk. Kaka smakte krydderkake med eit hint av graskar, og var veldig saftig. Her er linken til den engelske oppskrifta, og her er mine noko rare mål:

4,73 dl mjøl

2 ts bakepulver

2 ts kanel

1/4 ts salt

3 dl honning

2,365 dl smør

4, 73 dl graskarpuré

1 ts vaniljeekstrakt

4 egg

Forvarm ovnen til 175 grader. Bland honning, smør og graskarpure. Ha i det tørre, og bland til slutt inn eitt og eitt egg. Ha røra i ei smurd form, eg brukte rundt. Steik i rundt 30-35 min på 175 grader. Test om kaka er ferdig ved å stikka i den med ein tannpirkar eller ein trepinne, den skal vera tørr når du tar den ut igjen. Det er nok godt med glasur på kaka, men eg synest den var god utan og.
Den er best nysteikt :)

Graskarfrøa skylte eg godt i vatn, tørka dei med tørkepapir, og vendte dei i litt olje. Så spreidde eg dei utover eit steikebrett, krydra dei godt, og steikte dei på 135 grader i rundt ein time til dei var sprø og gylne. Eg rørte også litt i dei undervegs for å få dei jamt steikte.

Nam, kjempegod og sunn snacks! :D